500
Ua le mafai i se taumafaiga a le Pulega Faatonu poo le Kapeneta ona aveese le tofiga Fofoga Fetalai ma le Sui Fofoga Fetalai lea o bathroom tauave e le sui faipule o le itumalo o Faasaleleaga numera 3 ma le faipule o Aiga i le Tai.
O lea la ua tapena le itu a le malo ae lagolago e le itu agai e ave i le faamasinoga se finauga e faamuta ai le toe tauaveina e le susuga Papalii Lio Oloipola Taeu Masipa’u o le tofiga Fofoga Fetalai ma le tofiga Sui Fofoga Fetalai o bathroom tauave e le tofa Auapaau Mulipola Aloitafua.
O le tuuina atu i le faamasinoga o lea mataupu e mafua i le teena o lafo e lua a le kapeneta sa manino ai le mafuaaga, ua ia le tausisia tiute o lana tautoga o le loto faamaoni i le faafoeina o le fono usu a le atunuu ma o tuuaiga a le malo, ua iai ona aia feteenai ma ua faaituau.
O le finauina e le itu a le malo o le latou lafo e aveesea ai le Fofoga Fetalai na faailoa ai e le sui Palemia i le maota fono e mafai ona faaaoga le taiala ma le mau faaletulafono ua ta’ua o le doctrine of necessity e finau ai le faamuta loa o le tofiga o le Fofoga Fetalai ma le Sui Fofoga Fetalai.
O le taiala foi lea na finauina ai i le Faamasinoga Maualuga le faatautoga i le fale’ie o faipule uma o le vaega faaupufai o le Faatuatua i le Atua Samoa ua Tasi, ina ua loka faitotoa o le maota fono o le Palemene ma le mafai ai ona faatino le poloaiga a le faamasinoga maualuga sa faatonuina ai le faataunuu o le faatautoina o sui usufono o le paeaiga lona 17 a le Fono Aoao Faitulafono.
Ua faamauina ai i tala faasolopito o le tatou palemene le faatautoga i le fale’ie ina ua tulai mai tulaga le mautonu ina ua tuanai le palota tele o le tausaga 2021.
